התגלות ישוע המשיח פרקים ז - י"ב

התגלות
פרק ז

החתומים מבני ישראל

1 וְאַחֲרֵי-כֵן רָאִיתִי אַרְבָּעָה מַלְאָכִים עֹמְדִים עַל-אַרְבַּע כַּנְפוֹת הָאָרֶץ וְתֹפְשִׂים בְּאַרְבַּע רוּחֹתֶיהָ לְבִלְתִּי תְהִי רוּחַ נשֶׁבֶת לֹא בָאָרֶץ וְלֹא בַיָּם וְלֹא בְכָל-עֵץ׃(יחזקאל ז' ב') 2 וָאֵרֶא מַלְאָךְ אַחֵר עֹלֶה מִמִּזְרַח-שֶׁמֶשׁ וְנֹשֵׂא חוֹתַם אֵל-חָי וַיִּקְרָא בְּקוֹל גָּדוֹל אֶל-אַרְבָּעָה הַמַּלְאָכִים אֲשֶׁר הַפְּקֻדָּה בְיָדָם לְהַשְׁחִית אֶת-הָאָרֶץ וְאֶת-הַיָּם׃ 3 וַיֹּאמֶר אַל-תַּשְׁחִיתוּ אֶת-הָאָרֶץ וְאֶת-הַיָּם וְאֶת-הָעֵצִים עַד כִּי-חָתַמְנוּ אֶת-עַבְדֵי אֱלֹהֵינוּ עַל-מִצְחוֹתֵיהֶם׃(יחזקאל ט' ד', ו') 4 וָאֶשְׁמַע אֶת-מִסְפַּר הַנֶּחְתָּמִים מְאַת אֶלֶף וְאַרְבָּעָה וְאַרְבָּעִים אָלֶף אֲשֶׁר נֶחְתְּמוּ מִקֶּרֶב כָּל-בְּנֵי יִשְׂרָאֵל לְשִׁבְטֵיהֶם׃ 5 לְמַטֵּה בְנֵי-יְהוּדָה נֶחְתְּמוּ שְׁנֵים עָשָׂר אָלֶף לְמַטֵּה בְנֵי רְאוּבֵן נֶחְתְּמוּ שְׁנֵים עָשָׂר אָלֶף לְמַטֵּה בְנֵי-גָד נֶחְתְּמוּ שְׁנֵים עָשָׂר אָלֶף לְמַטֵּה בְנֵי-אֲשֶׁר נֶחְתְּמוּ שְׁנֵים עָשָׂר אָלֶף׃ 6 לְמַטֵּה בְנֵי-נַפְתָּלִי נֶחְתְּמוּ שְׁנֵים עָשָׂר אָלֶף לְמַטֵּה בְנֵי-מְנַשֶּׁה נֶחְתְּמוּ שְׁנֵים עָשָׂר אָלֶף׃ 7 לְמַטֵּה בְנֵי-שִׁמְעוֹן נֶחְתְּמוּ שְׁנֵים עָשָׂר אָלֶף לְמַטֵּה בְנֵי-לֵוִי נֶחְתְּמוּ שְׁנֵים עָשָׂר אָלֶף לְמַטֵּה בְנֵי-יִשָּׂשכָר נֶחְתְּמוּ שְׁנֵים עָשָׂר אָלֶף׃ 8 לְמַטֵּה בְנֵי-זְבֻלוּן נֶחְתְּמוּ שְׁנֵים עָשָׂר אָלֶף לְמַטֵּה בְנֵי-יוֹסֵף נֶחְתְּמוּ שְׁנֵים עָשָׂר אָלֶף לְמַטֵּה בְנֵי-בִנְיָמִין נֶחְתְּמוּ שְׁנֵים עָשָׂר אָלֶף׃

ההמון הרב

9 אַחֲרֵי-כֵן רָאִיתִי וְהִנֵּה הָמוֹן רָב מְאֹד אֲשֶׁר לֹא-יוּכַל אִישׁ לִסְפֹּר מִקֶּרֶב כָּל-הַגּוֹיִם וְהַמִּשְׁפָּחוֹת וְהָעַמִּים וְהַלְּשֹׁנוֹת בָּאוּ וַיַּעַמְדוּ לִפְנֵי הַכִּסֵּא וְלִפְנֵי הַשֶּׂה מְלֻבָּשִׁים שְׂמָלוֹת לְבָנוֹת וְכַפּוֹת תְּמָרִים בִּידֵיהֶם׃ 10 וַיִּקְרְאוּ בְקוֹל-גָּדוֹל וַיֹּאמְרוּ הַיְשׁוּעָה לֵאלֹהֵינוּ הַיּשֵׁב עַל-הַכִּסֵּא וְלַשֶּׂה׃ 11 וְכָל-הַמַּלְאָכִים הַנִּצָּבִים סָבִיב לַכִּסֵּא וְסָבִיב לַזְּקֵנִים וּלְאַרְבַּע הַחַיּוֹת נָפְלוּ עַל-פְּנֵיהֶם לִפְנֵי הַכִּסֵּא וַיִּשְׁתַּחֲווּ לֵאלֹהִים׃ 12 וַיֹּאמְרוּ אָמֵן הַבְּרָכָה וְהַתִּפְאֶרֶת וְהַבִּינָה וְהַתּוֹדָה וְהַגְּדֻלָּה וְהַגְּבוּרָה וְהַנֶּצַח לֵאלֹהֵינוּ עַד-עוֹלְמֵי עוֹלָמִים אָמֵן׃(תהילים כט' א'-ב'; מא' יד') 13 וַיַּעַן אֶחָד מִן-הַזְּקֵנִים וַיֹּאמֶר אֵלָי מִי אֵלֶּה הֵם הַמְלֻבָּשִׁים שְׂמָלוֹת לְבָנוֹת וּמֵאַיִן בָּאוּ׃ 14 וָאֹמַר אֵלָיו אֲדֹנִי אַתָּה יָדָעְתָּ וַיֹּאמֶר אֵלַי אֵלֶּה הֵם הַבָּאִים מֵרֹב צָרָה אֲשֶׁר כִּבְּסוּ שִׂמְלֹתָם בְּדַם הַשֶּׂה עַד אֲשֶׁר הִלְבִּינוּ׃(ירמיהו ל' ז') 15 וְעַל-כֵּן הֵם עֹמְדִים לִפְנֵי כִסֵּא הָאֱלֹהִים וּמְשָׁרְתִים לְפָנָיו בְּהֵיכָלוֹ יוֹמָם וָלָיְלָה וְהַיֹּשֵׁב עַל-הַכִּסֵּא יָגֵן עֲלֵיהֶם׃ 16 לֹא יִרְעָבוּ וְלֹא יִצְמְאוּ עוֹד וְלֹא-יַכֵּם שָׁרָב וָשָׁמֶשׁ׃(ישעיהו מט' י') 17 כִּי הַשֶּׂה אֲשֶׁר בְּתוֹךְ הַכִּסֵּא הוּא יִרְעֶה אֹתָם וְעַל-מַבּוּעֵי מַיִם חַיִּים יְנַהֲלֵם (יחזקאל לד' כג'; תהילים כג' ב') וּמָחָה אֱלֹהִים כָּל-דִּמְעָה מֵעֵינֵיהֶם׃(ישעיהו כה' ח')

התגלות
פרק ח

החותם השביעי

1 אַחַר פָּתַח אֶת-הַחוֹתָם הַשְּׁבִיעִי וַתְּהִי דְמָמָה בַשָּׁמַיִם כַּחֲצִי שָׁעָה׃(חבקוק ב' כ'; זכריה ב' יז') 2 וָאֵרֶא שִׁבְעָה שׁוֹפָרוֹת נְתוּנִים לְשִׁבְעַת הַמַּלְאָכִים הָעֹמְדִים לִפְנֵי הָאֱלֹהִים׃ 3 וַיָּבֹא מַלְאָךְ אַחֵר וַיַּעֲמֹד אֵצֶל הַמִּזְבֵּחַ וּבְיָדוֹ מִקְטֶרֶת זָהָב וַיִּתְנוּ לוֹ עֲתֶרֶת קְטֹרֶת לְהַקְטִיר עִם-תְּפִלּוֹת כָּל-הַקְּדוֹשִׁים עַל-מִזְבַּח הַזָּהָב אֲשֶׁר לִפְנֵי הַכִּסֵּא׃(תהילים קמא' ב') 4 וַיַּעַל עֲתַר עֲנַן הַקְּטֹרֶת עִם-תְּפִלּוֹת הַקְּדוֹשִׁים מִיַּד הַמַּלְאָךְ לִפְנֵי הָאֱלֹהִים׃ 5 וַיִּקַּח הַמַּלְאָךְ אֶת-הַמִּקְטֶרֶת וַיְמַלְאֶהָ אֵשׁ מֵעַל-הַמִּזְבֵּחַ וַיִּצֹּק עֲלֵי-הָאָרֶץ וַיְהִי קוֹל וָרַעַם וּבָרָק וָרָעַשׁ׃(יחזקאל י' ב'; שמות יט' טז')

השופרות

6 וְשִׁבְעַת הַמַּלְאָכִים עִם-שִׁבְעַת שׁוֹפְרֹתֵיהֶם עָמְדוּ נְכֹנִים לִתְקֹעַ׃ 7 וַיִּתְקַע הַמַּלְאָךְ הָרִאשׁוֹן וַיְהִי-בָרָד וְאֵשׁ וָדָם בְּלוּלִים יַחְדָּו שֹׁטְפִים אָרְצָה (יחזקאל לח' כב'; יואל ג' ג') וַתִּשָּׂרֵף שְׁלִישִׁית הָאָרֶץ וּשְׁלִישִׁית הָעֵצִים וְכָל-יֶרֶק עֵשֶׂב נִשְׂרָף׃ 8 וַיִּתְקַע הַמַּלְאָךְ הַשֵּׁנִי וּכְמוֹ הַר גָּדוֹל בֹּעֵר בָּאֵשׁ נָפַל אֶל-תּוֹךְ הַיָּם וּשְׁלִישִׁית הַיָּם נֶהְפְּכָה לְדָם׃(שמות ז' כ'-כא'; תהילים עח' מד') 9 וַיִּגְוַע כָּל-בָּשָׂר אֲשֶׁר נִשְׁמַת-רוּחַ חַיִּים בְּאַפָּיו אֲשֶׁר בַּשְּׁלִישִׁית הַיָּם וְהָאֳנִיּוֹת שְׁלִישִׁית מֵהֶן נֶהֱרָסוּ׃ 10 וַיִּתְקַע הַמַּלְאָךְ הַשְּׁלִישִׁי וַיִּפֹּל כּוֹכָב גָּדוֹל כְּלַפִּיד בֹּעֵר מִן-הַשָּׁמָיִם וַיִּפֹּל עַל-הַשְּׁלִישִׁית מִן-הַנְּהָרוֹת וּמִן-מַעְיְנוֹת הַמַּיִם׃ 11 וְהַכּוֹכָב נִקְרָא שְׁמוֹ לַעֲנָה וּשְׁלִישִׁית מִן-הַמַּיִם הָיְתָה לְלַעֲנָה וְרַבִּים מִבְּנֵי אָדָם מֵתוּ מִן-הַמַּיִם כִּי מָרִים הֵם׃ 12 וַיִּתְקַע הַמַּלְאָךְ הָרְבִיעִי וְהִנֵּה שְׁלִישִׁית מִן-הַשֶּׁמֶשׁ הֻכְּתָה וּשְׁלִישִׁית מִן-הַיָּרֵחַ וּשְׁלִישִׁית מִן-הַכּוֹכָבִים עַד כִּי-חָשְׁכָה שְׁלִישִׁיתָם וְהַיּוֹם לֹא הִגִּיהַּ אוֹרוֹ שְׁלִישִׁיתוֹ וְכֵן הַלָּיְלָה׃(יואל ג' ד') 13 וָאֵרָא וָאֶשְׁמַע מַלְאָךְ מְעוֹפֵף בַּחֲצִי הַשָּׁמַיִם קֹרֵא בְּקוֹל גָּדוֹל אוֹי אוֹי אוֹי לְישְׁבֵי הָאָרֶץ מִפְּנֵי קֹלוֹת הַשּׁוֹפָר אֲשֶׁר יֶתֶר שְׁלשֶׁת הַמַּלְאָכִים נְכֹנִים לִתְקֹעַ׃

התגלות
פרק ט

השופרות -- המשך

1 וַיִּתְקַע הַמַּלְאָךְ הַחֲמִישִׁי וָאֵרֶא כוֹכָב נֹפֵל מִן-הַשָּׁמַיִם אַרְצָה וַיִּנָּתֶן-לוֹ מַפְתֵּחַ לִבְאֵר הַתְּהוֹם׃(ישעיהו יד' יב') 2 וַיִּפְתַּח אֶת-בְּאֵר הַתְּהוֹם וַיַּעַל קִיטֹר מִן-הַבְּאֵר כְּקִיטֹר הַכִּבְשָׁן רַב-מְאֹד (בראשית יט' כח') וַתֶּחְשַׁךְ הַשֶּׁמֶשׁ וּפְנֵי הַשָּׁמַיִם מִקִּיטֹר הַבְּאֵר׃(יואל ב' ב'; ב' י') 3 וּמִתּוֹךְ הַקִּיטֹר יָצָא אַרְבֶּה עַל-הָאָרֶץ וְכֹחַ נִתַּן לָהֶם כְּכֹחַ הָעַקְרַבִּים בָּאָרֶץ׃(שמות י' יב') 4 וְהֵם צֻוּוּ לְבִלְתִּי שַׁחֵת אֶת-עֵשֶׂב הָאָרֶץ וְלֹא אֶת-הַיָּרָק וְלֹא אֶת-עֵץ הַשָּׂדֶה כִּי אִם-אֶת-הָאֲנָשִׁים לְבַדָּם אֲשֶׁר אֵין-לָהֶם חוֹתַם אֱלֹהִים עַל-הַמֶּצַח׃ 5 וְלֹא נִתַּן לָהֶם לַהֲמִיתָם כִּי אִם-רַק לְעַנֹּתָם חֲמִשָּׁה חֳדָשִׁים בְּמַכְאוֹב קָשֶׁה כְּמַכְאוֹב אָדָם אֲשֶׁר הָעַקְרָב יַכֶּנּוּ׃ 6 בַּיָּמִים הָהֵם יְבַקְשׁוּ בְנֵי-הָאָדָם אֶת-הַמָּוֶת וְלֹא יִמְצָאֻהוּ יִשְׁאֲלוּ אֶת-נַפְשָׁם לָמוּת וְהַמָּוֶת יִבְרַח מֵהֶם׃(ירמיהו ח' ג') 7 וּמַרְאֵה הָאַרְבֶּה כְּמַרְאֵה סוּסִים עֲרוּכִים לְמִלְחָמָה וְעַל-רָאשֵׁיהֶם כְּעַטְרוֹת זָהָב וְכִפְנֵי אֲנָשִׁים פְּנֵיהֶם׃(יואל ב' ד'-ה') 8 וְשֵׂעָר לָהֶם כִּשְׂעַר נָשִׁים וְשִׁנֵּיהֶם שִׁנֵּי אֲרָיוֹת׃(יואל א' ו') 9 וַעֲלֵיהֶם שִׁרְיֹנִים כְּשִׁרְיֹנֵי בַרְזֶל וְקוֹל כַּנְפֵיהֶם כְּקוֹל מַרְכְּבוֹת הֲמוֹן סוּסִים אֲשֶׁר יְרֻצוּן לַקְּרָב׃ 10 וּזְנָבוֹת לָהֶם כְּמוֹ עַקְרַבִּים וּבְזַנְבוֹתָם דָּרְבֹנוֹת אֲשֶׁר אוֹנָם בָּם לְעַנּוֹת אֶת-בְּנֵי אָדָם חֲמִשָּׁה חֳדָשִׁים׃ 11 וַעֲלֵיהֶם מֶלֶךְ הוּא מַלְאַךְ הַתְּהוֹם אֲשֶׁר שְׁמוֹ בִּשְׂפַת עֵבֶר אֲבַדּוֹן וְהַיְּוָנִים יִקְרְאוּ-לוֹ אַפּוֹלְיוֹן׃ 12 נְהִי אֶחָד חָלַף הָלַךְ-לוֹ וּנְהִי שֵׁנִי שְׁלִישִׁי הִנָּם בָּאִים׃ 13 וַיִּתְקַע הַמַּלְאָךְ הַשִּׁשִּׁי וָאֶשְׁמַע קוֹל קֹרֵא מִבֵּין קַרְנוֹת מִזְבַּח הַזָּהָב אֲשֶׁר לִפְנֵי אֱלֹהִים׃(שמות ל' א'-ג') 14 אֶל-הַמַּלְאָךְ הַשִּׁשִּׁי אֲשֶׁר הַשּׁוֹפָר בְּיָדוֹ לֵאמֹר הַתֵּר אֶת-אַרְבָּעָה הַמַּלְאָכִים הָאֲסוּרִים עַל-הַנָּהָר הַגָּדוֹל נְהַר-פְּרָת׃ 15 וְאַרְבָּעָה הַמַּלְאָכִים הֻתָּרוּ אֲשֶׁר עֲרוּכִים הָיוּ לַשָּׁעָה וְלַיּוֹם וְלַחֹדֶשׁ וְלַשָּׁנָה לְהָמִית אֶת-הַשְּׁלִישִׁית מִן-בְּנֵי הָאָדָם׃ 16 וּמִסְפַּר צִבְאוֹת הַפָּרָשִׁים עָלָה לִשְׁתֵּי רִבֹּאוֹת רְבָבוֹת כִּי-כֵן שָׁמַעְתִּי מִסְפָּרָם׃ 17 וְכֵן רָאִיתִי בֶחָזוֹן אֶת-הַסּוּסִים וְאֶת-רֹכְבֵיהֶם אֲשֶׁר שִׁרְיֹנֵיהֶם כְּמַרְאֵה אֵשׁ תְּכֵלֶת וְגָפְרִית וְרָאשֵׁי הַסּוּסִים כְּרָאשֵׁי אֲרָיוֹת וּמִפִּיהֶם עָלְתָה אֵשׁ עָשָׁן וְגָפְרִית׃ 18 בָּשָׁלשׁ מַגֵּפוֹת אֵלֶּה בָּאֵשׁ בֶּעָשָׁן וּבַגָּפְרִית הָעֹלוֹת מִפִּיהֶם הֻכָּה חֵלֶק שְׁלִישִׁי מִן-בְּנֵי הָאָדָם׃ 19 כִּי-כֹחַ הַסּוּסִים בְּמוֹ-פִיהֶם וּבְזַנְבוֹתָם כִּי זַנְבוֹתָם כִּנְחָשִׁים הֵם וְרָאשִׁים לָהֶם אֲשֶׁר בָּם הֵם מְחַבְּלִים׃ 20 וּשְׁאָר בְּנֵי הָאָדָם אֲשֶׁר לֹא מֵתוּ בַּמַּגֵּפוֹת הָאֵלֶּה לֹא-שָׁבוּ מִמַּעֲשֵׂי יְדֵיהֶם מֵהִשְׁתַּחֲוֹת עוֹד לַשֵּׁדִים וְלַעֲצַבֵּי זָהָב וָכֶסֶף וּנְחשֶׁת וְאֶבֶן וָעֵץ אֲשֶׁר לֹא-יִרְאוּן וְלֹא-יִשְׁמְעוּן וְלֹא יְהַלֵּכוּן׃(ישעיהו ב' ח'; תהילים קטו' ד'-ז') 21 וְגַם לֹא-שָׁבוּ מֵרֶצַח וּמִכְּשָׁפִים וּמִזְּנוּת וּמִגְּנֵבָה אֲשֶׁר בִּידֵיהֶם׃

התגלות
פרק י

המלאך והספר הקטן

1 וָאֵרֶא מַלְאָךְ אַחֵר אַדִּיר יֹרֵד מִן-הַשָּׁמָיִם (תהילים קג' כ') עֹטֶה עָנָן כַּשַּׂלְמָה וְקֶשֶׁת עַל-רֹאשׁוֹ פָּנָיו כְּעֵין הַשֶּׁמֶשׁ וְרַגְלָיו כְּעַמּוּדֵי אֵשׁ׃(דניאל י' ו'; יחזקאל א' כז'-כח') 2 וּבְיָדוֹ סֵפֶר קָטֹן פָּתוּחַ וַיַּצֵּג אֶת-רַגְלוֹ הַיְמָנִית עַל-הַיָּם וְאֶת-הַשְּׂמָאלִית עַל-הָאָרֶץ׃(יחזקאל ב' ט') 3 וְכַאֲרִי שֹׁאֵג קָרָא בְּקוֹל גָּדוֹל וּבְקָרְאוֹ הִשְׁמִיעוּ שִׁבְעַת הָרְעָמִים קוֹל דְּבָרִים׃(הושע יא' י') 4 וְכַאֲשֶׁר הִשְׁמִיעוּ שִׁבְעַת הָרְעָמִים קוֹל דִּבְרֵיהֶם הוֹאַלְתִּי לִכְתֹּב וָאֶשְׁמַע קוֹל מִן-הַשָּׁמַיִם לֵאמֹר אֵלַי חֲתוֹם אֶת-הַדְּבָרִים אֲשֶׁר הִשְׁמִיעוּ שִׁבְעַת הָרְעָמִים וְאַל-תִּכְתֹּב אֹתָם׃(דניאל ח' כו'; דניאל יב' ד'; יב' ט') 5 וְהַמַּלְאָךְ אֲשֶׁר רָאִיתִי עֹמֵד עַל-הַיָּם וְעַל-הָאָרֶץ הֵרִים אֶת-יְמִינוֹ אֶל-הַשָּׁמָיִם׃ 6 וַיִּשָּׁבַע בְּחֵי הָעוֹלָם (דניאל יב' ז') אֲשֶׁר בָּרָא אֶת-הַשָּׁמַיִם וְאֵת אֲשֶׁר-בָּם וְאֶת-הָאָרֶץ וּמְלוֹאָהּ וְאֶת-הַיָּם וְאֶת-אֲשֶׁר בְּתוֹכוֹ אִם-תִּמָשֵׁךְ עוֹד הָעֵת׃(תהילים קמו' ו') 7 רַק בַּיָּמִים הָהֵם אֲשֶׁר הַמַּלְאָךְ הַשְּׁבִיעִי יִתֵּן קוֹלוֹ וְיוֹאֵל לִתְקוֹעַ יִתֹּם סוֹד אֱלֹהַּ כַּאֲשֶׁר בִּשַּׂר אֶת-עֲבָדָיו הַנְּבִיאִים׃(עמוס ג' ז') 8 וְהַקּוֹל אֲשֶׁר שָׁמַעְתִּי מִן-הַשָּׁמַיִם דִּבֶּר אֵלַי שֵׁנִית לֵאמֹר לֵךְ קַח אֶת-הַסֵּפֶר הַפָּתוּחַ מִיַּד-הַמַּלְאָךְ הָעֹמֵד עַל-הַיָּם וְעַל-הָאָרֶץ׃ 9 וָאֵלֵךְ אֶל-הַמַּלְאָךְ וָאֹמַר אֵלָיו תְּנָה-לִּי אֶת-הַסֵּפֶר הַקָּטֹן וַיֹּאמֶר אֵלֵי קַח לְךָ וֶאֱכֹל אֹתוֹ וְהוּא יֵמַר לְבִטְנְךָ וּבְפִיךָ יִהְיֶה כִּדְבַשׁ לְמָתוֹק׃(יחזקאל ב' ח'; ג' א'-ג') 10 וָאֶקַּח אֶת-הַסֵּפֶר הַקָּטֹן מִיַּד-הַמַּלְאָךְ וָאֹכַל אֹתוֹ וַיְהִי בְפִי כִּדְבַשׁ לְמָתוֹק אַךְ הֵמַר לְבִטְנִי אַחֲרֵי אָכְלִי אֹתוֹ׃ 11 וַיֹּאמְרוּ אֵלָי הֲלֹא תוֹסִיף עוֹד לְהִנָּבֵא עַל-רַבִּים עַמִּים וְגוֹיִם וּלְשֹׁנוֹת וּמְלָכִים׃

התגלות
פרק יא

שני העדים

1 וַיִּנָּתֶן-לִי קָנֶה דּוֹמֶה לִקְנֵה הַמִּדָּה וַיַּעֲמֹד הַמַּלְאָךְ וַיֹּאמֶר קוּם וּמֹד אֶת-הֵיכָל הָאֱלֹהִים וְאֶת-הַמִּזְבֵּחַ וְאֶת-מְקוֹם הַמִּשְׁתַּחֲוִים שָׁם׃(יחזקאל מב' טו') 2 וְנָתַשְׁתָּ אֶת-חֲצַר הַהֵיכָל הַחִיצוֹן וְלֹא תָמֹד אֹתוֹ כִּי-נִתַּן בִּידֵי הַגּוֹיִם וְרָמְסוּ אֶת-עִיר הַקֹּדֶשׁ אַרְבָּעִים וּשְׁנַיִם חֹדֶשׁ׃(תהילים עט' א'; ישעיהו סג' יח'; דניאל יב' ז') 3 וְנָתַתִּי לִשְׁנֵי עֵדָי וְנִבְּאוּ יָמִים אֶלֶף מָאתַיִם וְשִׁשִּׁים בִּלְבוּשׁ שָׂק׃(דברים יט' טו') 4 אֵלֶּה הֵם שְׁנֵי הַזֵּיתִים וּשְׁתֵּי הַמְּנֹרוֹת הָעֹמְדִים עַל-אֱלֹהֵי הָאָרֶץ׃(זכריה ד' ג'; יא'-יד') 5 וְכִי-יְבַקֵּשׁ אִישׁ לִנְגֹּעַ בָּם תֵּצֵא אֵשׁ מִפִּיהֶם (שמואל ב', כב' ט') וְתֹאכַל אֶת-אֹיְבֵיהֶם מוֹת יָמוּת כָּל-הַמְבַקֵּשׁ לִנְגֹּעַ בָּם לְרָעָה׃ 6 וְהֵם יֶשׁ-לְאֵל יָדָם לַעֲצֹר אֶת-הַשָּׁמַיִם לְבִלְתִּי הֱיוֹת מָטָר כָּל-יְמֵי נְבוּאָתָם (מלכים א', יז' א') וְיֶשׁ לְאֵל יָדָם לַהֲפֹךְ אֶת-הַמַּיִם לְדָם וּלְהַכּוֹת אֶת-הָאָרֶץ בְּכָל-מַכָּה כְּדֵי חֶפְצָם׃(שמות ז' כ'-כא') 7 וּכְכַלּוֹת עֵדוּתָם תִּלָּחֶם-בָּם הַחַיָּה הָעֹלָה מִן-הַתְּהוֹם תִּגְבַּר עֲלֵיהֶם וְתַהֲרֹג אֹתָם׃(דניאל ז' ז'; ז' כא') 8 וּפִגְרֵיהֶם יִפְּלוּ בִּרְחוֹב הָעִיר הַגְּדֹלָה הַנִּקְרֵאת בִּשְׂפַת מָשָׁל סְדוֹם וּמִצְרָיִם אֲשֶׁר שָׁם-נִצְלַב גַּם-אֲדֹנֵיהֶם׃ 9 וְרַבִּים מִן-הָעַמִּים וְהַמִּשְׁפָּחוֹת וְהַלְּשֹׁנוֹת וְהַגּוֹיִם יִרְאוּ אֶת-פִּגְרֵיהֶם שְׁלשֶׁת יָמִים וָחֵצִי וְלֹא יִתְּנוּ לִקְבֹּר אֶת-הַחֲלָלִים בִּמְקוֹם קָבֶר׃(תהילים עט' ג') 10 וְישְׁבֵי הָאָרֶץ יָשִׂישׂוּ יָגִילוּ עֲלֵיהֶם וְיִשְׁלְחוּ מָנוֹת אִישׁ לְרֵעֵהוּ אַחֲרֵי אֲשֶׁר עָכְרוּ שְׁנֵי הַנְּבִיאִים הָאֵלֶּה אֶת-ישְׁבֵי הָאָרֶץ׃ 11 וּבִמְלֹאת שְׁלשֶׁת יָמִים וָחֵצִי בָּא בָהֶם רוּחַ חַיִּים מֵאֵת הָאֱלֹהִים וַיַּעַמְדוּ עַל-רַגְלֵיהֶם וְחִתַּת אֱלֹהִים נָפְלָה עַל-כָּל-רֹאֵיהֶם׃(יחזקאל לז' י') 12 וַיִּשְׁמְעוּ קוֹל גָּדוֹל קֹרֵא אֲלֵיהֶם מִן-הַשָּׁמַיִם לֵאמֹר עֲלוּ הֵנָּה וַיַּעֲלוּ בֶעָנָן הַשָּׁמַיִם וְעֵינֵי אֹיְבֵיהֶם רֹאוֹת׃ 13 וַיְהִי רַעַשׁ גָּדוֹל בָּעֵת הַהִיא וַתִּפֹּל עֲשִׂירִית הָעִיר וְשִׁבְעַת אֲלָפִים אֲנָשִׁים לְמִסְפַּר שֵׁמוֹת מֵתוּ בָרַעַשׁ וְהַנִּשְׁאָרִים רְעָדָה אֲחָזָתַם וַיִּתְּנוּ כָבוֹד לֵאלֹהֵי הַשָּׁמָיִם׃ 14 נְהִי הַשֵּׁנִי חָלַף הָלַךְ-לוֹ וּנְהִי הַשְּׁלִישִׁי עַד-מְהֵרָה הִנֵּה בָא׃

השופר השביעי

15 וַיִּתְקַע הַמַּלְאָךְ הַשְּׁבִיעִי וְקֹלוֹת גְּדוֹלִים נִשְׁמְעוּ בַשָּׁמַיִם לֵאמֹר הָיְתָה מַמְלֶכֶת הָאָרֶץ לַאֲדֹנֵינוּ וְלִמְשִׁיחוֹ וְהוּא יִמְלֹךְ לְעוֹלָם וָעֶד׃(דניאל ב' מד') 16 וְעֶשְׂרִים וְאַרְבָּעָה הַזְּקֵנִים הַיּשְׁבִים לִפְנֵי הָאֱלֹהִים עַל-כִּסְאוֹתָם נָפְלוּ עַל-פְּנֵיהֶם וַיִשְׁתַּחֲווּ לֵאלֹהִים׃ 17 וַיֹּאמְרוּ מוֹדִים אֲנַחְנוּ לְךָ יְהוָֹה אֱלֹהֵי צְבָאוֹת הוֶֹה וְהָיָה וְיָבוֹא כִּי לָבַשְׁתָּ עֹז גָּדְלְךָ וַתִּמְלֹךְ׃(תהילים קמה' יג' ) 18 הַגּוֹיִם רָגְשׁוּ בַחֲרוֹת אַפָּם עַד בֹּא חֲרוֹן אַפְּךָ (תהילים ב' א'-ב'; ב' ה') וְיוֹם הַמִּשְׁפָּט לִישֵׁנֵי עָפָר וְלָתֵת שָׂכָר לַעֲבָדֶיךָ הַנְּבִיאִים וְהַקְּדוֹשִׁים וְיִרְאֵי שִׁמְךָ הַקְּטַנִּים עִם-הַגְּדֹלִים וְלַעֲכֹר אֶת-עֹכְרֵי הָאָרֶץ׃(ישעיהו מ' י'; סא' ח') 19 אָז נִפְתַּח הֵיכַל הָאֱלֹהִים בַּשָּׁמַיִם וַאֲרוֹן בְּרִיתוֹ נִרְאָה שָּׁם בְּמִקְדָּשׁוֹ (שמות כה' ט') וַיִּתְמַלְּטוּ בְרָקִים וְקוֹלֹת רְעָמִים וּזְוָעָהוּבָרָד כָּבֵד׃(שמות יט' טז')

התגלות
פרק יב

האישה והתנין

1 וְאוֹת גָּדוֹל נִרְאָה אָז בַּשָּׁמָיִם אִשָּׁה עֹטָה מַעֲטֵה שֶׁמֶשׁ וּלְבָנָה תַּחַת רַגְלֶיהָ וְעַל-רֹאשָׁהּ יָצִיץ נֵזֶר שְׁנֵים עָשָׂר כּוֹכָבִים׃ 2 וְהִיא הָרָה לָלַת וַתִּזְעַק בַּחֲבָלֶיהָ כִּי נֶהְפְּכוּ עָלֶיהָ צִרֶיהָ׃(מיכה ד' י') 3 וַיֵּרָא אוֹת שֵׁנִי בַשָּׁמָיִם וְהִנֵּה תַּנִין גָּדוֹל כְּמַרְאֶה אֵשׁ וְלוֹ שִׁבְעָה רָאשִׁים וְעֶשֶׂר קְרָנַיִם וְעַל-רָאשָׁיו שֶׁבַע כֹּתָרוֹת׃ 4 וַיִּסְחַב בִּזְנָבוֹ שְׁלִישִׁית מִן-כּוֹכְבֵי הַשָּׁמַיִם (דניאל ח' י') וַיַּשְׁלִיכֵם אָרְצָה וַיַּעֲמֹד הַתַּנִּין לִפְנֵי הָאִשָּׁה לְעֵת לִדְתָּהּ לִבְלֹעַ אֶת-בְּנָהּ בְּהִוָּלְדוֹ׃ 5 וְהִיא יָלְדָה אֶת-בְּנָהּ בֵּן זָכָר אֲשֶׁר עֻתַּד לִרְעוֹת אֶת-הַגּוֹיִם כֻּלָּם בְּשֵׁבֶט בַּרְזֶל (תהילים ב' ט') וַיִּלָּקַח בְּנָהּ אֶל-הָאֱלֹהִים אֶל-כִּסְאוֹ׃ 6 וְהָאִשָּׁה בָּרְחָה לָּהּ הַמִּדְבָּרָה אֲשֶׁר-שָׁם הוּכַן-לָהּ מָקוֹם עַל-פִּי הָאֱלֹהִים לְכַלְכֵּל אֹתָהּ שָׁם יָמִים אֶלֶף וּמָאתַיִם וְשִׁשִּׁים׃(דניאל ז' כה'; יב' ז') 7 וַתְּהִי מִלְחָמָה בַּשָּׁמָיִם מִיכָאֵל וּצְבָאָיו עָרְכוּ קְרָב עִם-הַתַּנִּין וְהַתַּנִּין וּצְבָאָיו נִלְחֲמוּ עִמָּם׃ 8 וְלֹא יָכְלוּ לָהֶם וּמְקוֹמָם לֹא נִמְצָא עוֹד בַּשָּׁמָיִם׃(דניאל ב' לה') 9 וַיַּשְׁלִיכוּ אֶת-הַתַּנִּין הַגָּדוֹל הוּא הַנָּחָשׁ הַקַּדְמֹנִי אֲשֶׁר קָרְאוּ לוֹ שׂוֹטֵן וְשָׂטָן (בראשית ג' א') אֲשֶׁר הִדִּיחַ כָּל-ישְׁבֵי תֵבֵל אֹתוֹ וְאֶת-מַלְאָכָיו עִמּוֹ הִשְׁלִיכוּ אָרְצָה׃(ישעיהו יד' יב') 10 וָאֶשְׁמָע קוֹל גָּדוֹל בַּשָּׁמַיִם לֵאמֹר הַיּוֹם בָּאָה יְשׁוּעַת אֱלֹהֵינוּ גְּבוּרָתוֹ וּמַלְכוּתוֹ וּמֶמְשֶׁלֶת מְשִׁיחוֹ כִּי-הוּרַד שׂוֹטֵן אַחֵינוּ אֲשֶׁר-עָמַד לְשִׂטְנָם לִפְנֵי אֱלֹהֵינוּ יוֹמָם וָלָיְלָה׃(איוב א' ט', יא'; זכריה ג' א') 11 וְהֵם גָּבְרוּ עָלָיו בְּדַם הַשֶּׂה וּבְעֵדוּת פִּיהֶם וְלֹא-אָהֲבוּ אֶת-נַפְשָׁם עַד-מָוֶת׃ 12 עַל-כֵּן רָנּוּ שָׁמַיִם וְצַהֲלוּ אַתֶּם הַשֹּׁכְנִים שָׁם אוֹי לְישְׁבֵי הָאָרֶץ וּלְשֹׁכְנֵי הַיָּם כִּי-יָרַד אֲלֵיכֶם הַשָּׂטָן וַחֲמָתוֹ גְדוֹלָה מִדַּעְתּוֹ כִּי תִקְצַר עִתּוֹ׃ 13 וְכִרְאוֹת הַתַּנִּין כִּי הוּרַד אָרְצָה וַיִּרְדֹּף אַחֲרֵי הָאִשָּׁה אֲשֶׁר יָלְדָה אֵת בֵּן הַזָּכָר׃ 14 וַיֻּתְּנוּ לָאִשָּׁה שְׁתֵּי כְנָפַיִם כַּנְפֵי הַנֶּשֶׁר הַגָּדוֹל וַתָּעָף הַמִּדְבָּרָה אֶל-הַמָּקוֹם אֲשֶׁר יְכַלְכְּלוּ אֹתָהּ מוֹעֵד מוֹעֲדִים וָחֵצִי מִפְּנֵי הַנָּחָשׁ׃(***) 15 וַיָּקֶא הַנָּחָשׁ נְהַר-מַיִם מִפִּיו אַחֲרֵי הָאִשָּׁה לְשָׁטְפָהּ בַּנָּהָר׃ 16 וַתַּעֲזֹר הָאָרֶץ לָאִשָּׁה וָתִּפְתַּח הָאָרֶץ אֶת-פִּיהָ וַתִּבְלַע אֶת-הַנָּהָר אֲשֶׁר-הֵקִיא הַתַּנִּין מִפִּיו׃ 17 וַיִּקְצֹף הַתַּנִּין עַל-הָאִשָּׁה וַיֵּלֶךְ לְהִלָּחֵם בְּיֶתֶר זַרְעָהּ (בראשית ג' טו') שֹׁמְרֵי מִצְוֹתאֱלֹהִים וְעֵדוּת יֵשׁוּעַ הַמָּשִׁיחַ אִתָּם׃