התגלות ישוע המשיח פרקים י"ג - י"ח

התגלות
פרק יג

שתי החיות

1 וָאֶעֱמֹד עַל-חוֹל שְׂפַת הַיָּם וָאֵרֶא חַיָּה עֹלָה מִן-הַיָּם אֲשֶׁר לָהּ שִׁבְעָה רָאשִׁים וְעֶשֶׂר קְרָנָיִם וְעַל-קַרְנֶיהָ עֶשֶׂר עֲטָרוֹת וּשְׁמוֹת גִּדּוּפִים עַל-רָאשֶׁיהָ׃ 2 וְהַחַיָּה אֲשֶׁר עֵינַי רָאוּ דָּמְתָה לְנָמֵר וְרַגְלֶיהָ רַגְלֵי דֹב וּפִיהָ פִי אֲרִי וְהַתַּנִּין נָתַן לָהּ אֶת-כֹּחוֹ וְאֶת-כִּסְאוֹ וּמִמְשָׁל-רָב׃(דניאל ז' ד'-ז') 3 וָאֶחֱזֶה אֶחָד מֵרָאשֶׁיהָ כְּמֻכֶּה מַכַּת מָוֶת וּמַכַּת הַמָּוֶת נִרְפָּאָה וְכָל-הָאָרֶץ הֶעֱרִיצוּ אֶת-הַחַיָּה וַיִּנְהֲרוּ אַחֲרֶיהָ׃ 4 וַיִּשְׁתַּחֲווּ אֶל-הַתַּנִּין כִּי-נָתַן מֶמְשָׁלָה לַחַיָּה וְלִפְנֵי הַחַיָּה הִשְׁתַּחֲווּ לֵאמֹר מִי כְמוֹ הַחַיָּה מִי יָעֹז לְהִלָּחֵם בָּהּ׃ 5 וְלָהּ נִתַּן פֻּם מְמַלֵּל רַבְרְבָן וַחֲרָפוֹת וְכֹחַ נִתַּן-לָהּ לַעֲשׂוֹת כִּרְצוֹנָהּ שְׁנַיִם וְאַרְבָּעִים חֹדֶשׁ׃(דניאל ז' ח'; יא' לו'; ח' כד') 6 וַתִּפְתַּח אֶת-פִּיהָ לְחָרֵף אֶת-הָאֱלֹהִים וּלְגַדֵּף אֶת-שְׁמוֹ וְאֶת-מִשְׁכָּנוֹ וְאֶת-שֹׁכְנֵי הַשָּׁמָיִם׃ 7 וַיִּנָּתֶן-לָהּ לַעֲשׂוֹת מִלְחָמָה עִם-הַקְּדוֹשִׁים וְלִגְבֹּר עֲלֵיהֶם וּמֶמְשָׁלָה נִתְּנָה לָהּ עַל כָּל-שֵׁבֶט וָעָם וְלָשׁוֹן וָגוֹי׃(דניאל ז' כא') 8 וְכָל-ישְׁבֵי הָאָרֶץ יִשְׁתַּחֲווּ לְפָנֶיהָ כֹּל אֲשֶׁר לֹא נִכְתְּבוּ שְׁמוֹתָם מִנִּי אָז תִּוָּסֶד אָרֶץ בְּסֵפֶר חַיֵּי הַשֶּׂה הַטָּבוּחַ׃(דניאל יב' א') 9 מִי אֲשֶׁר-אָזְנַיִם לוֹ יִשְׁמָע׃ 10 מִי אֲשֶׁר יִשְׁבֶּה שֶּׁבִי בַּשְּׁבִי יֵלֵךְ מִי אֲשֶׁר יָמִית בַּחֶרֶב בַּחֶרֶב (ירמיהו מג' יא') יוּמָת בְּזֹאת נִמְצָא עֹצֶר רוּחַ וֶאֱמוּנָה לִקְדשִׁים׃ 11 וָאֵרֶא חַיָּה אַחֶרֶת עֹלָה מִן-הָאֲדָמָה בַּעֲלַת שְׁתֵּי קְרָנַיִם כְּכֶבֶשׂ וּמְדַבֶּרֶת כְּפִי תַנִּין׃ 12 וְהִיא משֶׁלֶת עַל-פְּנֵי הַחַיָּה הָרִאשֹׁנָה בְּכָל-מֶמְשַׁלְתָּהּ וּבִפְעֻלַּת יָדֶיהָ הִשְׁתַּחֲווּ הָאָרֶץ וְישְׁבֶיהָ לִפְנֵי הַחַיָּה הָרִאשֹׁנָה הַנִּרְפָּאָה מִן-מַכַּת הַמָּוֶת׃ 13 וַתַּעַשׂ מוֹפְתִים גְּדוֹלִים עַד גַּם-לְהוֹרִיד אֵשׁ מִן-הַשָּׁמַיִם אַרְצָה לְעֵינֵי בְנֵי אָדָם׃ 14 וַתַּדִּיחַ אֶת-ישְׁבֵי הָאָרֶץ בְּמוֹפְתִים הַנְּתוּנִים לָהּ לַעֲשׂוֹת לִפְנֵי הַחַיָּה (דברים יג' ב'-ד') וַתֹּאמֶר אֶל-ישְׁבֵי הָאָרֶץ לַעֲשׂוֹת צֶלֶם לַחַיָּה אֲשֶׁר-הֻכְּתָה מַכַּת-חֶרֶב וַתֶּחִי׃ 15 וְגַם נִתַּן לָהּ לְהָפִיחַ רוּחַ בְּצֶלֶם הַחַיָּה עַד אֲשֶׁר יָכֹל לְדַבֵּר וְלַעֲשׂוֹת חֹק מִי אֲשֶׁר-לֹא יִשְׁתַּחֲוֶה לְצֶלֶם הַחַיָּה יוּמָת׃(דניאל ג' ו') 16 וַתִּגְזָר אֹמֶר כִּי כַקָּטֹן כַּגָּדוֹל כֶּעָנִי כֶּעָשִׁיר כָּעֶבֶד כְּבֶן-חוֹרִים כֻּלָּם יַתְווּ תָו עַל-יַד יְמִינָם אוֹ עַל-מִצְחָם׃ 17 וְכִי לֹא-יוּכַל אִישׁ לִקְנוֹת וְלִמְכֹּר בִּלְתִּי הוּא אֲשֶׁר לוֹ הַתָּו הוּא שֵׁם הַחַיָּה אוֹ-מִסְפַר שְׁמָהּ׃ 18 פֹּה חָכְמָה צְפוּנָה וְהַמַּשְׂכִּיל יְחַשֵּׁב אֶת-מִסְפַּר הַחַיָּה כִּי מִסְפַּר אָדָם הוּא וּמִסְפָּרוֹ תֹרֹסֹוֹ׃

התגלות
פרק יד

השיר החדש של הפדויים

1 וָאֶשָּׂא עֵינַי וְהִנֵּה-שֶׂה עֹמֵד עַל-הַר צִיּוֹןה (תהילים ב' ו') וְאֶצְלוֹ מֵאָה וְאַרְבָּעִים אֶלֶף נֶפֶשׁ וְאַרְבַּעַת אֲלָפִים הֵם אֲשֶׁר שְׁמוֹ וְשֵׁם אָבִיו כְּתוּבִים עַל-מִצְחָם׃ 2 וָאֶשְׁמַע קוֹל מִן-הַשָּׁמַיִם כְּקוֹל מַיִם רַבִּים (יחזקאל א' כד') כְּקוֹל רַעַם אַדִּיר וָאַקְשִׁיב קֶשֶׁב וְהִנֵּה הוּא קוֹל מְנַגְּנִים הַפֹּרְטִים עַל-פִּי נִבְלֵיהֶם׃ 3 וַיָּשִׁירוּ שִׁיר חָדָשׁ לִפְנֵי הַכִּסֵּא וְלִפְנֵי אַרְבַּע הַחַיּוֹת וְהַזְּקֵנִים מִבְּלִי יְכֹלֶת אִישׁ לִלְמֹד אֶת-הַשִּׁירָה הַזֹּאת בִּלְתִּי מֵאָה וְאַרְבָּעִים אֶלֶף וְאַרְבַּעַת אֲלָפִים אֵלֶּה אֲשֶׁר נִפְדּוּ מִן-הָאָרֶץ׃(תהילים לג' ג'; ישעיהו מב' י') 4 הֲלֹא הֵם אֲשֶׁר לֹא-נְגֹאֲלוּ בְנָשִׁים כִּי בְתֻמָּתָם הֵם כִּבְתוּלוֹת וְהֹלְכִים אַחֲרֵי הַשֶּׂה אֶל-אֲשֶׁר יֵלֵךְ וּפְדוּיִם הֵם מִקֶּרֶב בְּנֵי הָאָדָם כְּבִכּוּרִים לֵאלֹהִים וְלַשֶּׂה׃(ירמיהו ב' ג') 5 וּמִרְמָה לֹא-נִמְצְאָה בְפִיהֶם כִּי יְשָׁרִים וּתְמִימִים הֵם לִפְנֵי כִּסֵא הָאֱלֹהִים׃(צפניה ג' יג'; שיר השירים ד' ז')

הבשורה של שלושת המלאכים

6 וָאֵרֶא מַלְאָךְ אַחֵר מְעוֹפֵף בְּלֵב הַשָּׁמַיִם וּבְשׁרַת עוֹלָם בְּיָדוֹ לְהַגִּיד לְישְׁבֵי הָאָרֶץ וּלְכָל-גּוֹי וְשֵׁבֶט וְלָשׁוֹן וָעָם׃ 7 וַיִּקְרָא בְּקוֹל גָּדוֹל יִרְאוּ אֶת-הָאֱלֹהִים וְהָבוּ-לוֹ כָבוֹד (ישעיהו מב' יב'; ירמיהו יג' טז') כִּי יוֹם הַמִּשְׁפָּט הִנֵּה בָא הִשְׁתַּחֲווּ לְפָנָיו אֲשֶׁר עָשָׂה אֶת-הַשָּׁמַיִם וְאֶת-הָאָרֶץ אֶת-הַיָּם וְאֵת כָּל-מַעְיְנוֹ מָיִם׃(תהילים קמו' ו'; תהילים צה' ה') 8 וּמַלְאָךְ אַחֵר קֹרֵא אַחֲרָיו נָפְלָה נָפְלָה בָּבֶל הָעִיר הַגְּדוֹלָה (ישעיהו כא' ט') אֲשֶׁר מִיֵּין חֲמַת תַּזְנֻתָהּ הִשְׁקְתָה אֶת-כָּל-הַגּוֹיִם׃(ירמיהו נא' ז') 9 וּמַלְאָךְ שְׁלִישִׁי קֹרֵא אַחֲרֵיהֶם בְּקוֹל גָּדוֹל מִי אֲשֶׁר יִשְׁתַּחֲוֶה אֶל-הַחַיָּה וְאֶל-צַלְמָהּ וְיִתְוֶה אֶת-הַתָּו עַל-מִצְחוֹ אוֹ עַל-יָדוֹ׃ 10 גַּם-הוּא יִשְׁתֶּה מִיֵּין חֲמַת אֱלֹהִים מִכּוֹס הַתַּרְעֵלָה הַמְּלֵאָה מֶזֶג זַעְמוֹ וְיִתְגֹּלֵל בְּזַלְעֲפוֹת אֵשׁ וְגָפְרִית לְעֵינֵי צְבָא הַקֹּדֶשׁ וּלְעֵינֵי הַשֶּׂה׃(תהילים עה' ט'; ירמיהו כה' טו') 11 וַעֲשַׁן כּוּר עָנְיָם יַעֲלֶה עַד-עוֹלְמֵי עוֹלָמִים וּמָנוֹחַ לֹא יִמְצְאוּ יוֹמָם וָלַיְלָה הַמִּשְׁתַּחֲוִים אֶל-הַחַיָּה וְאֶל-צַלְמָהּ וַאֲשֶׁר הִתְווּ תָו שְׁמָהּ עַל-בְּשָׂרָם׃(ישעיהו לד' י') 12 פֹּה נִמְצָא עֹצֶר רוּחַ לִקְדשִׁים פֹּה הַשֹּׁמְרִים מִצְוֹת הָאֱלֹהִים וֶאֱמוּנַת יֵשׁוּעַ׃ 13 וָאֶשְׁמַע קוֹל קֹרֵא אֵלַי מִן-הַשָּׁמַיִם כְּתֹב אַשְׁרֵי הַמֵּתִים אֲשֶׁר מִן-הַיּוֹם וָהָלְאָה יָמוּתוּ בַאדֹנָי וְאַף גַּם-הָרוּחַ עָנָה לֵאמֹר שָׁם יָנוּחוּ יְגִיעֵי כֹחַ וְהָלַךְ אַחֲרֵיהֶם מַעֲשֵׂה צִדְקָם׃(ישעיהו נז' ב')

קציר הארץ

14 וָאֶשָּׂא עֵינַי וְהִנֵּה עָנָן צַח וְעַל-הֶעָנָן רֹכֵב כִּדְמוּת בֶּן-אָדָם (דניאל ז' יג') וְנֵזֶר זָהָב עַל-רֹאשׁוֹ וּבְיָדוֹ מַגָּל מְלֻטָּשׁ׃ 15 וּמַלְאָךְ אַחֵר יָצָא מִן-הַהֵיכָל וַיִּקְרָא בְּקוֹל גָּדוֹל אֶל-הָרֹכֵב עַל-הֶעָנָן שְׁלַח אֶת-הַמַּגָּל וּקְצֹר כִּי בָא מוֹעֵד לִקְצֹר אַחֲרֵי אֲשֶׁר בָּשַׁל קְצִיר הָאָרֶץ׃ 16 וַיִּשְׁלַח הָרֹכֵב עַל-הֶעָנָן אֶת-מַגָּלוֹ עַל-פְּנֵי הָאָרֶץ וַיִּקְצֹר אֶת-קְצִיר הָאָרֶץ׃ 17 וּמַלְאָךְ אַחֵר יָצָא מִן-הַהֵיכָל אֲשֶׁר בַּמָּרוֹם וְגַם-בְּיָדוֹ מַזְמֵרָה מְלֻטָּשָׁה׃ 18 וַיָּבֹא מַלְאָךְ אַחֵר מִן-הַמִּזְבֵּחַ אֲשֶׁר לוֹ שִׁלְטוֹן עַל-הָאֵשׁ וַיִּקְרָא בְּקוֹל גָּדוֹל אֶל-אֲשֶׁר לוֹ הַמַּזְמֵרָה הַמְלֻטָּשָׁה לֵאמֹר שְׁלַח אֶת-הַמַּזְמֵרָה הַמְלֻטָּשָׁה וּבְצֹר אֶת-אַשְׁכְּלֹת גֶּפֶן הָאָרֶץ כִּי-הִבְשִׁילוּ עֲנָבֶיהָ׃(עמוס ח' א'-ב') 19 וַיָּנֶף הַמַּלְאָךְ אֶת-מַזְמֵרָתוֹ עַל-הָאָרֶץ וַיִּבְצֹר אֶת-אַשְׁכְּלֹת גֶּפֶן הָאָרֶץ וַיַּשְׁלִכֵן אֶל-תּוֹךְ הַגַּת הַגְּדוֹלָה הִיא גַת חֲמַת אֱלֹהִים׃ 20 וַיִּדְרְכוּ בַגַּת מִחוּץ לָעִיר (ישעיהו סג' ג'; יואל ד' יג') וַיֵּצֵא דָם מִן-הַגַּת וַיַּגִּיעַ עַד-רִסְנֵי הַסּוּסִים דֶּרֶךְ אֶלֶף וְשֵׁשׁ-מֵאוֹת כִּבְרַת אָרֶץ׃

התגלות
פרק טו

שבע המכות האחרונות

1 וָאֵרֶא מוֹפֵת אַחֵר גָּדוֹל וְנוֹרָא בַּשָּׁמָיִם שִׁבְעָה מַלְאָכִים נֹשְׂאִים שֶׁבַע מַגֵּפוֹת אַחֲרֹנוֹת כִּי בָהֵנָּה תִּתֹּם חֲמַת אֱלֹהִים׃ 2 וּכְיַם זְכוֹכִית בָּלוּל בָּאֵשׁ נִרְאָה לְעֵינָי וְאֵלֶּה אֲשֶׁר גָּבְרוּ עַל-הַחַיָּה וְעַל-צַלְמָהּ וְעַל-תָּוָה וּמִסְפַּר שְׁמָהּ עֹמְדִים עַל-יַם הַזְּכוֹכִית וְכִנֹּרוֹת-אֵל בְּיָדָם׃ 3 אָז יָשִׁירוּ שִׁיר משֶׁה עֶבֶד הָאֱלֹהִים (שמות טו' א'-טו') וְשִׁיר הַשֶּׂה לֵאמֹר גְּדֹלִים וְנוֹרָאִים מַעֲשֶׂיךָ יְהוָֹה אֱלֹהֵי צְבָאוֹת וּדְרָכֶיךָ אֱמֶת וָצֶדֶק מֶלֶךְ הַקְּדּוֹשִׁים׃(תהילים צב' ו'; דברים לב' ד'; תהילים כב' כח') 4 מִי לֹא יִרָאֲךָ יְהוָֹה מִי לֹא יִתֵּן כָּבוֹד לִשְׁמֶךָ קָדוֹשׁ אַתָּה לְבַדְּךָ וְכָל-הַגּוֹיִם יָבֹאוּ וְיִשְׁתַּחֲווּ לְפָנֶיךָ כִּי-צִדְקָתְךָ נִגְלָתָה׃(תהילים צט' ג'; פו' ט'; צח' ב') 5 וְאַחֲרֵי-כֵן רָאִיתִי וְהִנֵּה הֵיכַל מִשְׁכַּן הָעֵדוּת נִפְתַּח בַּשָּׁמָיִם׃(שמות כה' ט') 6 וְשִׁבְעָה מַלְאָכִים נֹשְׂאֵי שֶׁבַע הַמַּגֵּפוֹת יָצְאוּ מִן-הַהֵיכָל מְלֻבָּשִׁים בִּגְדֵי-שֵׁשׁ צַּח וּבָהִיר וַחֲגוֹרֵי אֵזוֹר זָהָב בְּמָתְנֵיהֶם׃ 7 וַתִּתֵּן אַחַת מֵאַרְבַּע הַחַיּוֹת אֶל-שִׁבְעַת הַמַּלְאָכִים שִׁבְעָה מִזְרְקֵי זָהָב מְלֵאִים חֲמַת אֱלֹהִים אֵל חַי עַד-עוֹלְמֵי עוֹלָמִים׃ 8 וְהַהֵיכָל יִמָּלֵא עָשָׁן (שמות מ' לד'; ישעיהו ו' ד') מִכְּבוֹד עֹז אֱלֹהִים וְלֹא יָכֹל אִישׁ לָבֹא אֶל-הַהֵיכָל עַד אֲשֶׁר תִּכְלֶינָה שֶׁבַע הַמַּגֵּפוֹת אֲשֶׁר בִּידֵי שִׁבְעַת הַמַּלְאָכִים׃(דברי הימים ב', ה' יד')

התגלות
פרק טז

קערות זעם אלהים

1 וָאֶשְׁמַע קוֹל גָּדוֹל מִן-הַהֵיכָל קֹרֵא אֶל-שִׁבְעַת הַמַּלְאָכִים (ישעיהו סו' ו') לֵאמֹר לְכוּ וְהָרִיקוּ אֶת-שִׁבְעָה הַמִּזְרָקִים הַמְּכִילִים חֲמַת הָאֱלֹהִים עַל-הָאָרֶץ׃(ירמיהו י' כה' ; צפניה ג' ח') 2 וַיֵּלֶךְ הָרִאשׁוֹן וַיָּרֶק אֶת-מִזְרָקוֹ עַל-הָאָרֶץ וַיְהִי לִשְׁחִין רָע פֹּרֵחַ בָּאֲנָשִׁים אֲשֶׁר תָּו הַחַיָּה בָּהֶם וְהַמִּשְׁתַּחֲוִים אֶל-צַלְמָהּ׃(שמות ט' ט'; דברים כח' לה') 3 וַיָּרֶק הַשֵּׁנִי אֶת-מִזְרָקוֹ אֶל-תּוֹךְ הַיָּם וַיְהִי לְדָם כַּדָּם אֲשֶׁר יָזוּבוּ פְגָרִים מֵתִים וַתָּמָת כָּל-נֶפֶשׁ חַיָּה אֲשֶׁר בַּיָּם׃(שמות ז' כ'-כא') 4 וַיָּרֶק הַשְּׁלִישִׁי אֶת-מִזְרָקוֹ עַל-הַנְּהָרוֹת וְעַל-מַעְיְנֵי מָיִם וַיֵּהָפְכוּ לְדָם׃ 5 וָאֶשְׁמַע אֶת-מַלְאַךְ הַמַּיִם אֹמֵר צַדִּיק אַתָּה יְהוָֹה הַהוֶֹה וְהָיָה וְיִהְיֶה כִּי-כֵן חָרָצְתָּ׃ 6 הֵם שָׁפְכוּ דַם קְדשִׁים וּנְבִיאִים וְאַתָּה הִשְׁקִיתָם דָּם כִּי-כֵן יָאֲתָה לָהֶם׃(תהילים עט' ג'; ישעיהו מט' כו') 7 וָאֶשְׁמַע קוֹל מִן-הַמִּזְבֵּחַ אֹמֵר אָמֵן מִשְׁפָּטְךָ יְהוָֹה אֱלֹהִים אֵל שַׁדַּי אֱמֶת וָצֶדֶק׃(תהילים יט' י') 8 וְהָרְבִיעִי הֵרִיק אֶת-מִזְרָקוֹ עַל-פְּנֵי הַשָּׁמֶשׁ וַיִנָּתֶן-לוֹ לְלַהֵט אֶת-הָאֲנָשִׁים בָּאֵשׁ׃(מלאכי ג' יט') 9 וַיִּצָּרְבוּ הָאֲנָשִׁים בְּלַהַט נוֹרָא מְאֹד וַיְגַדְּפוּ אֶת-שֵׁם אֱלֹהִים הַשַּׁלִּיט עַל-הַמַּגֵּפוֹת הָאֵלֶּה וְלֹא שָׁבוּ לָתֶת-לוֹ כָּבוֹד׃(ירמיהו ה' ג') 10 וַיָּרֶק הַחֲמִישִׁי אֶת-מִזְרָקוֹ עַל-כִּסֵּא הַחַיָּה וַתֶּחְשַׁךְ מַלְכוּתָהּ (שמות י' כא'-כב') וַיְנַשְּׁכוּ אֶת-לְשׁוֹנָם מֵרֹב כְּאֵבָם׃ 11 וַיְגַדְּפוּ אֶת-אֱלֹהֵי הַשָּׁמַיִם (ישעיהו ח' כא') מִפְּנֵי הַמַּכְאוֹב וְהַשְּׁחִין וְלֹא שָׁבוּ מִמַּעֲשֵׂיהֶם׃ 12 וַיָּרֶק הַשִּׁשִּׁי אֶת-מִזְרָקוֹ אֶל-תּוֹךְ הַנָּהָר הַגָּדוֹל נְהַר-פְּרָת וַיֶּחֶרְבוּ מֵימָיו לְפַנּוֹת דֶּרֶךְ לִפְנֵי הַמְּלָכִים הַבָּאִים מִמִּזְרַח-שָׁמֶשׁ׃(נחום א' ד') 13 וָאֵרֶא שְׁלשָׁה רוּחוֹת טְמֵאִים כְּתַבְנִית צְפַרְדְּעִים יֹצְאִים מִפִּי הַתַּנִּין וּמִפִּי הַחַיָּה וּמִפִּי נְבִיא הַשָּׁקֶר׃ 14 כִּי הֵם רוּחוֹת הַשֵּׁדִים הָעֹשִׂים מוֹפְתִים וּבָאִים אֶל-מַלְכֵי אֶרֶץ וְתֵבֵל כֻּלָּה לֶאֱסֹף אֹתָם לְמִלְחָמָה לַיּוֹם הַגָּדוֹל הוּא יוֹם אֱלֹהֵי צְבָאוֹת׃ 15 הִנְנִי בָא כְּגַנָּב אַשְׁרֵי הָאִישׁ הַנֵּעוֹר וְאֶת-בְּגָדָיו הוּא נֹצֵר לְבִלְתִּי יֵלֵךְ עָרֹם וְרָאוּ אֶת-עֶרְוָתוֹ׃ 16 וְהֵם הִקְהִילוּ אֹתָם אֶל-הַמָּקוֹם אֲשֶׁר הָעִבְרִים יִקְרְאוּ לוֹ הַר מְגִדּוֹ׃ 17 וְהַשְּׁבִיעִי הֵרִיק אֶת-מִזְרָקוֹ עַל-פְּנֵי רְקִיעַ הַשָּׁמָיִם וַיֵּצֵא קוֹל גָּדוֹל מִן-הַהֵיכָל הָעֶלְיוֹן מִן-הַכִּסֵּא לֵאמֹר נֶעֱשָׂתָה׃ 18 וְהִנֵּה נִשְׁמְעוּ קֹלוֹת וּבְרָקִים וּרְעָמִים וַיְהִי רַעַשׁ גָּדוֹל אֲשֶׁר לֹא-הָיָה כָמֹהוּ לְמִן-הֱיוֹת אָדָם עַל-הָאָרֶץ כִּי גָדֹל הָרַעַשׁ עַד-מְאֹד׃(שמות יט' טז') 19 וַתֵּחָלֵק הָעִיר הַגְּדוֹלָה לִשְׁלשָׁה חֲלָקִים עָרֵי הַגּוֹיִם נָפָלוּ וּבָבֶל הַגְּדוֹלָה נִפְקְדָה לִפְנֵי הָאֱלֹהִים לְהַשְׁקוֹתָהּ כּוֹס יֵין חֲמַת אַפּוֹ׃(ישעיהו כא' ט'; ירמיהו כה' טו') 20 נָדְדוּ אִיֵּי הַיָּם וְהֶהָרִים נֶעְתְּקוּ מִמְּקוֹמָם וְאֵינָם׃ 21 וּמִן-הַשָּׁמַיִם הִמְטִירוּ בָרָד כָּבֵד כְּכִכָּר עַל-רָאשֵׁי הָאֲנָשִׁים (יהושוע י' יא') וַיְגַדְּפוּ הָאֲנָשִׁים אֶת-הָאֱלֹהִים עַל-דְּבַר מַגֵּפַת הַבָּרָד כִּי-כָבְדָה מַכָּתוֹ עַד-מְאֹד׃

התגלות
פרק יז

הזונה הגדולה והחיה

1 וַיָּבֹא אֶחָד מִן-שִׁבְעַת הַמַּלְאָכִים נֹשְׂאֵי שִׁבְעַת הַמִּזְרָקִים וַיְדַבֵּר עִמָּדִי לֵאמֹר אֵלַי בֹּא וְאַרְאֲךָ אֶת-מִשְׁפַּט הַזּוֹנָה הַגְּדוֹלָה הַיּשֶׁבֶת עַל-מַיִם רַבִּים׃(ירמיהו נא' יג') 2 אֲשֶׁר זָנוּ אַחֲרֶיהָ מַלְכֵי הָאָרֶץ וְישְׁבֵי תֵבֵל הִשְׁתַּכְּרוּ מִיֵּין תַּזְנֻתָהּ׃(ירמיהו נא' ז') 3 וַיּוֹלִיכֵנִי בָרוּחַ הַמִּדְבָּרָה וָאֵרֶא אִשָּׁה ישֶׁבֶת עַל-חַיָּה אֲדֻמָּה כַתּוֹלָע מְלֵאָה שְׁמוֹת גִּדּוּפִים וְשִׁבְעָה רָאשִׁים לָהּ וְעֶשֶׂר קְרָנָיִם׃ 4 וְהָאִשָּׁה לְבוּשָׁהּ אַרְגָּמָן וּשְׁנִי תוֹלַעַת וְעֹטָה זָהָב אַבְנֵי-חֵפֶץ וּפְנִינִים וְכוֹס זָהָב בְּיָדָהּ מְלֵאָה שִׁקּוּצִים וְתוֹעֲבוֹת זְנוּנֶיהָ׃(***) 5 וְעַל-מִצְחָהּ כָּתוּב שֵׁם בְּדֶרֶךְ סוֹד בָּבֶל הַגְּדוֹלָה הִיא אֵם הַזְּנוּת וְשִׁקּוּצֵי הָאָרֶץ׃ 6 וָאֵרֶא אֶת-הָאִשָּׁה שִׁכֹּרָה מִדַּם הַקְּדוֹשִׁים וְעֵדֵי יֵשׁוּעַ וְשַׁמָּה אֲחָזַתְנִי עַד-מְאֹד מַרְאוֹת אֹתָהּ׃ 7 וַיֹּאמֶר אֵלַי הַמַּלְאָךְ לָמָּה זֶּה תִּשְׁתּוֹמֵם הִנְנִי מַגִּיד לְךָ סוֹד הָאִשָּׁה וְהַחַיָּה הַנֹּשֵׂאת אֹתָהּ בַּעֲלַת שִׁבְעָה רָאשִׁים וְעֶשֶׂר קְרָנָיִם׃(דניאל ז' ז') 8 הַחַיָּה אֲשֶׁר רָאֲתָה עֵינְךָ הָיְתָה בָאָרֶץ אַחֲרֵי-כֵן חָלְפָה לָּהּ וְעוֹד תַּעֲלֶה מִן-הַתְּהוֹם וְלַאֲבַדּוֹן תֵּרֵד וְישְׁבֵי תֵבֵל אֲשֶׁר לֹא נִכְתְּבוּ שְׁמוֹתָם בְּסֵפֶר הַחַיִּים מֵרֹאשׁ מִקַּדְמֵי אֶרֶץ שַׁמָּה תֹאחֲזֵם בִּרְאֹתָם אֶת-הַחַיָּה אֲשֶׁר הָיְתָה וְאֵינֶנָּה וַעֲתִידָה לָבֹא׃(דניאל ז' ג') 9 פֹּה אִישׁ תְּבוּנוֹת יָבִין שִׁבְעָה הָרָאשִׁים שִׁבְעָה הָרִים הֵם אֲשֶׁר הָאִשָּׁה ישֶׁבֶת עֲלֵיהֶם׃ 10 וְהַמְּלָכִים שִׁבְעָה הֵם חֲמִשָּׁה מֵהֶם נָפָלוּ אֶחָד מֹלֵךְ כַּיּוֹם וְהָאַחֲרוֹן לֹא-בָא עוֹד וְהָיָה כִּי יָבֹא יַעֲמֹד אַךְ לִזְמָן קָטֹן׃ 11 וְהַחַיָּה אֲשֶׁר הָיְתָה וְאֵינֶנָּה הוּא מֶלֶךְ שְׁמִינִי וּמִן-הַשִּׁבְעָה הוּא וְלַאֲבַדּוֹן יֵלֵךְ׃ 12 וְעֶשֶׂר הַקְּרָנַיִם אֲשֶׁר רָאִיתָ עֲשָׂרָה מְלָכִים הֵם אֲשֶׁר לֹא הִגִּיעוּ עוֹד לַמְּלוּכָה כִּי אִם-כִּמְלָכִים יִמְשְׁלוּ שָׁעָה אַחַת עִם-הַחַיָּה׃(דניאל ז' כ'; ז' כד') 13 וְרוּחַ אֶחָד בָּהֶם וְאֶת-חֵילָם וּמֶמְשַׁלְתָּם יִתְּנוּ אֶל-הַחַיָּה׃ 14 וְהֵם יִלָּחֲמוּ אֶת-הַשֶּׂה וְהַשֶּׂה יִגְבַּר עֲלֵיהֶם כִּי הוּא אֲדוֹן הָאֲדֹנִים וּמֶלֶךְ הַמְּלָכִים וּצְבָאָיו עִמּוֹ קְרִיאֵי אֵל בְּחִירָיו וְנֶאֱמָנָיו׃(דברים י' יז'; תהילים קלו' ג'; דניאל ב' מז') 15 וַיּוֹסֶף וַיֹּאמֶר אֵלָי הַמַּיִם אֲשֶׁר רָאִיתָ אֲשֶׁר ישֶׁבֶת שָׁם הַזּוֹנָה הֵם עַמִּים וּקְהַל עַמִּים וְגוֹיִם וּלְשֹׁנוֹת׃(ישעיהו ח' ז') 16 וְעֶשֶׂר הַקְּרָנַיִם אֲשֶׁר רָאִיתָ עִם-הַחַיָּה הֵם יַחְדָּו יִשְׂנְאוּהָ אֶת-הַזּוֹנָה וְהִצִּיגוּהָ שֹׁמֵמָה וַעֲרֻמָּה וְאָכְלוּ אֶת-בְּשָׂרָהּ וּשְׂרָפוּהָ כָּלִיל בָּאֵשׁ׃(יחזקאל טז' מ'-מא') 17 כִּי הָאֱלֹהִים נָתַן בְּלִבָּן לְמַלֵּא אֶת-עֲצָתוֹ וְלִהְיוֹת לָהֶן דֵּעָה אֶחָת לָתֵת אֶת-מֶמְשַׁלְתָּן לַחַיָּה עַד כִּי-יִתַּמּוּ דִבְרֵי הָאֱלֹהִים מֵהָחֵל וְעַד-כַּלֵּה׃ 18 וְהָאִשָּׁה אֲשֶׁר רָאִיתָ הִיא הָעִיר הַגְּדוֹלָה שָׂרָתִי בְמַמְלְכוֹת הָאָרֶץ׃

התגלות
פרק יח

מפלת בבל

1 וְאַחֲרֵי-כֵן רָאִיתִי מַלְאָךְ אַחֵר יֹרֵד מִן-הַשָּׁמָיִם שַׂר וְגָדוֹל וְהָאָרֶץ הֵאִירָה מִכְּבֹדוֹ׃ 2 וַיִּקְרָא בְּכֹחַ וְעֹז לֵאמֹר נָפְלָה נָפְלָה בָּבֶל הַגְּדוֹלָה (ישעיהו כא' ט') הָיְתָה לִנְוֵה שְׂעִירִים בָּתֵּי כְלָאִים לְכָל-רוּחַ טָמֵא וְקֵן לְכָל-עוֹף שֶׁקֶץ וְנִתְעָב׃(ישעיהו יג' כא'; ירמיהו נ' לט') 3 כִּי מִיֵין חֲמַת תַּזְנֻתָהּ שָׁחוּ כָל-הַגּוֹיִם וּמַלְכֵי תֵבֵל זָנוּ אֵלֶיהָ וְסֹחֲרֵי אֶרֶץ הֶעְשִׁירוּ מִשִּׁפְעַת חֵיל תַּעֲנֻגֶיהָ׃(נחום ג' ד') 4 וָאֶשְׁמַע קוֹל אַחֵר מִן-הַשָּׁמַיִם קֹרֵא צְאוּ מִתּוֹכָהּ עַמִּי פֶּן-תִּגְּעוּ בְחַטֹּאתֶיהָ וְדָבְקוּ בָכֶם תַּחֲלֻאֶיהָ׃(ירמיהו נא' ו'; נא' מה') 5 כִּי נָגְעוּ אֶל-הַשָּׁמַיִם חַטֹּאתֶיהָ וַיִּזְכֹּר אֱלֹהִים אֶת-עֲוֹנָהּ׃(ירמיהו נא' ט') 6 שַׁלְּמוּ-לָהּ גְּמוּלָהּ שֶׁגָּמְלָה לָכֶם עֲשׂוּ-לָהּ כִּפְלָיִם בְּמֶסֶךְ הַכּוֹס אֲשֶׁר מָסְכָה מִסְכוּ-לָהּ כִּפְלָיִם׃(תהילים קלז' ח'; ירמיהו נ' כט') 7 כַּאֲשֶׁר הָיְתָה גְבִירָה וּמְעֻנָּגָה כֵּן הָבִיאוּ עָלֶיהָ מַדְוֶה וָאֵבֶל כִּי אָמְרָה בִלְבָבָהּ מַלְכָּה אֲנִי לְעוֹלָם לֹא אֵשֵׁב אַלְמָנָה וְלֹא אֵדַע שְׁכוֹל׃(ישעיהו מז' ח') 8 עַל-כֵּן תָּבֹאנָה לָּהּ בְּיוֹם אֶחָד כָּל-תַּחֲלֻאֶיהָ מָוֶת אֵבֶל וְרָעָב וְהָיְתָה לְמַאֲכֹלֶת אֵשׁ (ישעיהו מז' ט') כִּי חָזָק יְהוָֹה אֱלֹהִים הַשֹּׁפֵט אֹתָהּ׃(ירמיהו נ' לד') 9 וּמַלְכֵי-אֶרֶץ אֲשֶׁר זָנוּ אֹתָהּ וְהִתְעַלְּסוּ עִמָּהּ בְּתַעֲנוּגִים יִבְכּוּ יִסְפְּדוּ לָהּ בִּרְאֹתָם אֶת-עֲשַׁן שְׂרֵפָתָהּ׃ 10 וּמִמָּגוֹר וְשֶׁבֶר מֵרָחוֹק יַעַמְדוּ וְקוֹנֵנוּ אוֹי-לָךְ אוֹי-לָךְ בָּבֶל עִיר רַבָּתִי עָם קִרְיָה נִשְׂגָּבָה בְּרֶגַע אֶחָד בָּא עָלַיִךְ מִשְׁפָּטֵךְ׃(יחזקאל כו' טז'-יז') 11 וּבָכוּ וְהִתְאַבְּלוּ עָלֶיהָ כְּנַעֲנֵי-אָרֶץ כִּי אֵין קֹנֶה עוֹד לְסַחְרָם׃(יחזקאל כז' לה'-לו') 12 סְחַר זָהָב וָכֶסֶף וְאֶבֶן יְקָרָה וּפְנִינִים שֵׁשׁ וְאַרְגָּמָן וּמֶשִׁי וְשָׁנִי כָּל-עֲצֵי בְשָׂמִים כְּלֵי שֶׁנְהַבִּים וּכְלֵי עֵצִים יְקָרִים נְחשֶׁת בַּרְזֶל וָשָׁיִשׁ׃ 13 קִנְּמָן-בֶּשֶׂם וּקְטֹרֶת סַמִּים מֹר וּלְבוֹנָה יַיִן וְשֶׁמֶן סֹלֶת וְחִטִּים מִקְנֵה בָקָר וְצֹאן סוּס וְרֶכֶב עֶבֶד וְשִׁפְחָה׃ 14 רָחַק מִמֵּךְ פְּרִי תַאֲוָה לְעֵינָיִךְ וְכָל-עֲדָנִים וּמְגָדִים לֹא תִמְצְאִי-עוֹד אָזְלוּ לָהֶם וְאֵינָם׃ 15 וְהָרֹכְלִים אֲשֶׁר מָצְאוּ אוֹן לָהֶם בְּעִזְבוֹנֶיהָ מִמָּגוֹר וּמִשֶּׁבֶר יַעַמְדוּ מֵרָחוֹק וּבָכוּ אֵלֶיהָ וְסָפְדוּ לֵאמֹר׃(***) 16 אַלְלַי לַקִּרְיָה הַגְּדוֹלָה אֲשֶׁר לָבְשָׁה שֵׁשׁ וְאַרְגָּמָן וְשָׁנִי וַתַּעַד עֲדִי-זָהָב אַבְנֵי-חֵפֶץ וּפְנִינִים׃ 17 אֵיךְ סָפוּ תַּמּוּ כְּרֶגַע כָּל-הוֹן עָתָק זֶה וְכָל-חֹבֵל וְעֹבֵר אָרְחוֹת יַמִּים מַלָּחִים וְעֹשֵׂי מְלָאכָה בְּמַיִם רַבִּים מֵרָחוֹק עָמָדוּ׃ 18 וַיִּצְעֲקוּ בִרְאֹתָם אֶת-עֲשַׁן שְׂרֵפָתָהּ לֵאמֹר אַיֵּה עִיר כָּעִיר הַגְּדוֹלָה׃ 19 וַיִּזְרְקוּ עָפָר עַל-רָאשֵׁיהֶם (יחזקאל כז' ל') וַיִּזְעֲקוּ בִּבְכִי וְאֵבֶל לֵאמֹר אַלְלַי לַקִּרְיָה הַגְּדוֹלָה מֵחֵיל עָשְׁרָהּ הֶעֱשִׁירוּ כָּל-בַּעֲלֵי אֳנִיּוֹת בַּיָּם וְעַתָּה הֲפוּכָה הִיא כְּמוֹ-רָגַע׃(יחזקאל כו' יט') 20 צַהֲלוּ וָרֹנּוּ שָׁמַיִם קְדשִׁים שְׁלִיחִים וּנְבִיאִים כִּי-נָקַם אֱלֹהִים אֶת-נִקְמַתְכֶם מִיָּדָהּ׃(ירמיהו נא' מח') 21 וּמַלְאָךְ אֶחָד גִּבּוֹר נָשָׂא אֶבֶן גְּדוֹלָה כְּפֶלַח רֶכֶב וַיַּשְׁלֵךְ אֶל-תּוֹךְ הַיָּם וַיֹּאמַר כָּכָה תִּשְׁקַע בָּבֶל הָעִיר הַגְּדוֹלָה בְּשֶׁצֶף קֶצֶף וְלֹא-תִמָּצֵא עוֹד׃(ירמיהו נא' סג'-סד') 22 לֹא-ישָּׁמַע עוֹד בָּךְ קוֹל מְנַגְּנִים וְשָׁרִים וְהֶמְיַת חֲלִלִים וַחֲצֹצְרוֹת וְכָל-חָרָשׁ וְחשֵׁב לֹא-יִמָּצֵא עוֹד בְתוֹכֵךְ אַף לֹא יִשָּׁמַע בָּךְ קוֹל רֵחָיִם׃(ישעיהו כד' ח'; יחזקאל כו' יג') 23 וְאוֹר נֵר לֹא יָאֶר-בָּךְ וְקוֹל חָתָן וְקוֹל כַּלָּה אָבַד מִמֵּךְ (ירמיהו כה' י') יַעַן כְּנַעֲנַיִךְ הָיוּ נִכְבַּדֵּי-אֶרֶץ וּבִכְשָׁפַיִךְ נִדְּחוּ כָל-הַגּוֹיִם׃(***) 24 וְדַם הַנְּבִיאִים וְהַקְּדוֹשִׁים נִמְצָא בִכְנָפֶיהָ וְכָל-חַלְלֵי הָאָרֶץ׃